مسلم کونسل آف ایلڈرز نے، فضیلت مآب امامِ اکبر پروفیسر ڈاکٹر احمد الطیب، شیخ الازہر الشریف کی سربراہی میں، زور دیا ہے کہ مہاجرین کا مسئلہ موجودہ دنیا کو درپیش سب سے بڑے انسانی چیلنجز میں سے ایک ہے، جس کے حل کے لیے بین الاقوامی سطح پر مشترکہ کوششوں کی اشد ضرورت ہے۔ لاکھوں افراد جنگوں، تنازعات، قدرتی آفات اور بحرانوں کے باعث اپنے گھروں کو چھوڑ کر امن اور سلامتی کی تلاش میں ہجرت کرنے پر مجبور ہوئے ہیں۔
کونسل نے عالمی یومِ مہاجرین (جو ہر سال 20 جون کو منایا جاتا ہے) کے موقع پر جاری بیان میں کہا کہ انسانی وقار ایک بنیادی حق ہے، جسے کسی بھی حالت میں مجروح نہیں کیا جا سکتا۔ مہاجرین کا تحفظ، دیکھ بھال اور ان کے لیے باعزت زندگی کا انتظام کرنا ایک انسانی، اخلاقی اور قانونی ذمہ داری ہے، جو اسلامی تعلیمات، دیگر آسمانی مذاہب اور مشترکہ انسانی اقدار-جیسے رحم، یکجہتی، باہمی تعاون اور انسانی عزت کے احترام- پر مبنی ہے۔
مسلم کونسل آف ایلڈرز نے عالمی برادری سے اپیل کی کہ وہ بے دخلی اور ہجرت کی بنیادی وجوہات -جیسے مسلح تنازعات، تشدد، انتہاپسندی اور انسانی حقوق کی خلاف ورزیاں- کے حل کے لیے مشترکہ اقدامات کو فروغ دے، اور بحرانوں کے پُرامن حل کی حمایت کرے۔ اس سے مہاجرین کو اپنے ممالک میں محفوظ اور رضاکارانہ واپسی کا موقع ملے گا، اور عالمی سطح پر امن، استحکام اور پائیدار ترقی کو فروغ حاصل ہوگا۔
کونسل نے اس بات کی بھی نشاندہی کی کہ “اخوتِ انسانی کی دستاویز” (2019، ابوظہبی)، جس پر فضیلت مآب امامِ اکبر پروفیسر ڈاکٹر احمد الطیب اور سابق پوپ فرانسس نے دستخط کیے تھے، مہاجرین، محروم طبقات اور بے گھر افراد کی تکالیف کم کرنے کی اہمیت پر زور دیتی ہے، اور یہ پیغام دیتی ہے کہ تمام انسان باہمی طور پر ایک ہی انسانی خاندان کا حصہ ہیں، جن کے حقوق اور ذمہ داریاں مشترکہ ہیں۔
مزید برآں، مسلم کونسل آف ایلڈرز نے ان ممالک، اداروں، عالمی تنظیموں، امدادی اداروں اور اقوام متحدہ کے ادارہ برائے مہاجرین کی کوششوں کو سراہا جو مہاجرین کی مدد اور ان کی مشکلات کم کرنے میں مصروف ہیں۔ کونسل نے واضح کیا کہ حقیقی انسانی یکجہتی صرف بنیادی ضروریات کی فراہمی تک محدود نہیں، بلکہ اس میں مہاجرین کو تعلیم، صحت، روزگار اور باعزت زندگی کے مواقع فراہم کرنا بھی شامل ہے، تاکہ ان کی انسانیت محفوظ رہے اور آنے والی نسلوں کا مستقبل بہتر بنایا جا سکے۔