اساتذہ کے عالمی دن کے موقع پر، مسلم کونسل آف ایلڈرز: "اساتذہ انسانیت کی تعمیر اور ایک زیادہ روادار اور پرامن مستقبل بنانے میں ضروری شراکت دار ہیں۔”

شیخ الازہر، چئیرمین مسلم کونسل آف ایلڈرز: استاد اقدار کی تعمیر، شعور کی تشکیل اور ایسے باصلاحیت افراد کی تیاری کی بنیاد ہے جو اپنے وطن کی ترقی اور انسانیت کی خدمت میں کردار ادا کر سکیں۔

مسلم کونسل آف ایلڈرز نے اس بات پر زور دیا ہے کہ استاد انسان سازی، نئی نسلوں کے شعور کی تشکیل اور معاشروں کے مستقبل کی تعمیر میں بنیادی ستون کی حیثیت رکھتا ہے۔ استاد ایک ایسی عظیم ذمہ داری نبھاتا ہے جو علم و معرفت کی ترویج کے ساتھ ساتھ اخلاقی اقدار کے فروغ، مثبت سوچ کی نشوونما، مکالمے کی ثقافت اور اختلافِ رائے کے احترام کو بھی شامل کرتی ہے۔

عالمی یومِ اساتذہ کے موقع پر، جو ہر سال 5 اکتوبر کو منایا جاتا ہے، کونسل نے اپنے بیان میں کہا کہ اسلام نے علم کو بلند مقام عطا کیا ہے اور علماء و اساتذہ کی قدر و منزلت کو نمایاں کیا ہے۔ علم کا حصول انسان اور معاشرے کی ترقی کا ذریعہ قرار دیا گیا ہے، جیسا کہ اللہ تعالیٰ کا فرمان ہے:

﴿يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ﴾ ” ترجمہ اللہ تم میں سے ایمان والوں اور علم والوں کے درجات بلند فرماتا ہے۔” (سورۂ مجادلہ: 11)، کونسل نے واضح کیا کہ استاد کی ذمہ داری ایک عظیم امانت ہے، کیونکہ وہ ذہنوں کی تعمیر، نفوس کی تربیت، اقدار کے فروغ اور ایسی نسلوں کی تیاری میں اہم کردار ادا کرتا ہے جو اپنے معاشروں کی ترقی اور انسانیت کی خدمت میں مؤثر کردار ادا کر سکیں۔

اس موقع پر فضیلت مآب امامِ اکبر پروفیسر ڈاکٹر احمد الطیب، شیخ الازہر الشریف، چئیرمین مسلم کونسل آف ایلڈرز نے کہا کہ استاد نسلوں کا معمار ہے۔ وہی طلبہ کے دلوں میں اخلاقی اقدار کی پہلی بنیاد رکھتا ہے اور ان میں خیر، ذمہ داری اور دوسروں کے احترام کے اصول راسخ کرتا ہے۔ ان کا کردار صرف علم منتقل کرنے تک محدود نہیں بلکہ شخصیت سازی، شعور کی تشکیل اور ایسی باشعور نسل کی تیاری تک پھیلا ہوا ہے جو اپنے وطن کی ترقی، سربلندی اور انسانیت کی خدمت میں مؤثر کردار ادا کر سکے۔

بیان میں مزید کہا گیا کہ تعلیم شعور بیدار کرنے اور جہالت، تعصب، نفرت اور انتہا پسندی کا مقابلہ کرنے کا ایک مؤثر ذریعہ ہے۔ اساتذہ نئی نسلوں کے دلوں میں مکالمہ، رواداری، بقائے باہمی اور انسانی تنوع کے احترام جیسی اقدار راسخ کرنے میں بنیادی کردار ادا کرتے ہیں۔ وہ نوجوانوں کو ذمہ داری کا احساس اور انسانی وقار کے احترام کی تربیت دیتے ہیں، جس سے معاشرے انتہا پسند نظریات سے محفوظ رہتے، باہمی افہام و تفہیم کو فروغ دیتے اور امن و سلامتی کے قیام میں مددگار بنتے ہیں۔

مسلم کونسل آف ایلڈرز نے عالمی برادری سے مطالبہ کیا کہ اساتذہ کی حمایت، انہیں بااختیار بنانے اور ان کے لیے موزوں تعلیمی ماحول فراہم کرنے کی کوششوں کو مزید مضبوط بنایا جائے۔ اس کے ساتھ ساتھ ان کی مسلسل تربیت اور پیشہ ورانہ ترقی کا اہتمام کیا جائے تاکہ وہ علم اور ٹیکنالوجی کے شعبوں میں تیزی سے آنے والی تبدیلیوں کے ساتھ ہم آہنگ رہ سکیں۔