مسلم کونسل آف ایلڈرز، فضیلت مآب امام اکبر پروفیسر ڈاکٹر احمد الطیب شیخ الازھر کی سربراہی میں، فکری حفاظت اور بصیرت افروز آگاہی ہر قسم کی انتہاپسندی، نسل پرستی، دہشت گردی اور اسلاموفوبیا کے مقابلے میں پہلی دفاعی ڈھال کی حیثیت رکھتی ہے۔
مسلم کونسل آف ایلڈرز نے "شدت پسندانہ انتہاپسندی کے نتیجے میں دہشت گردی کی روک تھام کے بین الاقوامی دن” کے موقع پر اپنے بیان میں کہا کہ شدت پسندانہ انتہاپسندی اور نفرت انگیز بیانیے کا بڑھتا ہوا رجحان کسی ایک مذہب یا ثقافت سے منسلک نہیں۔ بیان میں مزید کہا گیا کہ شہری اقدار کے فروغ، مکالمے کی ثقافت کے استحکام، تنوع کے احترام اور روشن فکر دینی آگاہی کے پھیلاؤ کی ضرورت ہے، خصوصاً نوجوانوں میں، کیونکہ وہ انتہاپسند گروہوں کا سب سے زیادہ نشانہ بنتے ہیں۔
فضیلت مآب امام اکبر پروفیسر ڈاکٹر احمد الطیب، شیخ الازہر چیرمین مسلم کونسل آف ایلڈرز نے وضاحت کی کہ دینِ اسلام کی تعلیمات اور تمام آسمانی مذاہب انسانیت کی بھلائی کے لیے نازل کیے گئے ہیں، اور کبھی بھی نفرت، تشدد، انتہاپسندی یا دہشت گردی کا پیغام نہیں رہے۔ انہوں نے اس بات پر زور دیا کہ مختلف مذاہب، ثقافتوں اور نسلوں سے تعلق رکھنے والے تمام انسانوں کے درمیان مکالمے، رواداری، بقائے باہمی اور امن کے فروغ کے لیے اجتماعی کوششیں ناگزیر ہیں، کیونکہ یہی راستہ معاشروں کے تحفظ اور انسانی وقار کے احترام کی ضمانت فراہم کرتا ہے۔
مسلم کونسل آف ایلڈرز انتہاپسندانہ نظریات کے خاتمے اور غلط فہمیوں کی اصلاح کے لیے مسلسل کوششیں کر رہی ہے۔ اسی مقصد کے لیے مشرق اور مغرب کے درمیان 7 بین المذاہب و بین الثقافتی مکالمے منعقد کیے گئے، 15 سے زائد بین الاقوامی امن کارواں دنیا کے مختلف خطوں میں بھیجے گئے، اور "امن ساز نوجوان” فورم کا انعقاد کیا گیا، جس کا مقصد نوجوانوں کو امن اور انسانی بقائے باہمی کے فروغ میں فعال کردار ادا کرنے کے قابل بنانا ہے۔ ان تمام اقدامات کا نقطۂ عروج 2019 میں ابوظہبی میں تاریخی "انسانی بھائی چارہ کی دستاویز” کے دستخط تھے، جن پر فضیلت مآب امام اکبر پروفیسر ڈاکٹر احمد الطیب شیخ الازہر اور کیتھولک چرچ کے سابق رہنما مرحوم پوپ فرانسس نے دستخط کیے۔
مسلم کونسل آف ایلڈرز ایک بار پھر اس عزم کا اظہار کرتا ہے کہ وہ انسانی اخوت اور امن کے اقدار کو فروغ دینے کے لیے اپنی کوششیں جاری رکھے گا، اور بین الاقوامی شراکت داروں کے ساتھ مل کر ایسے معاشرے تشکیل دینے کے لیے کام کرے گا جن میں باہمی احترام غالب ہو اور انسانی وقار کا تحفظ یقینی بنایا جائے۔ یہ کوششیں متعدد پروگراموں اور عملی اقدامات کے ذریعے کی جائیں گی جن کا مقصد حکمت کی آواز کو بلند کرنا اور مکالمے، رواداری اور پُرامن بقائے باہمی کی قدروں کو عام کرنا ہے۔