قاہرہ بین الاقوامی کتاب میلے کے 57ویں ایڈیشن میں مسلم کونسل آف ایلڈرز کے پویلین نے اپنی گیارہویں ثقافتی نشست منعقد کی جس کا عنوان تھا "ایک فلسفے کی طرف جو حکمت کے دور کو قائم کرتا ہے: کتاب "ہوا پر گرفت کا مطالعہ – علم، وحی، اور فلسفہ پر غور و فکر”۔ جس میں کتاب کے مصنف ڈاکٹر مصطفیٰ حجازي (سیاسی مفکر)نے شرکت کی، اور اس نشست کی نظامت ڈاکٹر سمیر بودینار، الحکما سینٹر فار پیس ریسرچ کے ڈائریکٹر نے کی۔
اس نشست میں کتاب "ہوا پر گرفت” کا تحلیلی مطالعہ پیش کیا گیا۔ گفتگو میں ان بڑے فکری سوالات پر روشنی ڈالی گئی جنہیں کتاب نے علم، وحی اور فلسفہ کے میدان میں اٹھایا ہے، اور یہ بحث کی گئی کہ تیزی سے بدلتے ہوئے علمی ماحول میں حکمت کے تصور کو کیسے مضبوط کیا جائے اور متوازن فکری شعور کیسے پیدا ہو سکتا ہے۔
ڈاکٹر مصطفیٰ حجازي نے بتایا کہ کتاب کا مخاطب وہ لکھاری، استاد اور مفکر ہیں جو انسانی فکر کی تجدید چاہتے ہیں- ایسا خطاب جو عقل کو حیران کرنے کے بجائے بیدار کرے، اور روح کو نصیحتوں میں ڈبونے کی بجائے اس میں چھپی ہوئی "حقیقی حیرت” کو جگائے۔
انہوں نے مزید کہا کہ کتاب ان لوگوں کے لیے لکھی گئی ہے جنہیں فکری بے چینی رہتی ہے، جو روح اور مادے کے درمیان توازن تلاش کرتے ہیں، اور جنہیں یہ خوف ہوتا ہے کہ کہیں ان کا ایمان عقل سے خالی نہ ہوجائے، یا عقل حکمت سے محروم نہ رہ جائے، یا ان کے اعمال فکر کے بغیر نہ رہیں، یا ان کا سفر بغیر مقصد کے نہ ہو۔
ڈاکٹر حجازي نے واضح کیا کہ کتاب کا بنیادی محور "حقیقت” کے گم گشتہ سوالات کی تلاش ہے۔ انہوں نے کہا کہ جدید ٹیکنالوجی نے بعض ذہنوں سے فیصلہ کرنے کی صلاحیت چھین لی ہے، اور وہ صرف ظاہری چیزوں کے پیچھے چل پڑے ہیں، جبکہ کچھ لوگ اب بھی گزرے ہوئے زمانوں میں پناہ لیے بیٹھے ہیں، ایسے خیالات کے ساتھ جو آج کی انسانیت سے بہت پیچھے رہ گئے ہیں۔ کتاب "ٹوٹے ہوئے انسان” کو یہ پیغام دیتی ہے کہ اسے دو انتہاؤں میں سے ایک کا انتخاب کرنے کی ضرورت نہیں، بلکہ اسے دوبارہ غوروفکر کو زندہ کرنا ہوگا، کیونکہ نہ وحی علم کی دشمن ہے، نہ علم مقصد کے بغیر مکمل ہوتا ہے، اور فلسفہ ایک ضروری ذریعہ ہے۔
نشست کے آخر میں کتاب "ہوا پر گرفت” کی دستخطی تقریب بھی ہوئی، جس میں حاضرین نے مصنف سے ملاقات کی اور کتاب کے موضوعات اور اس کے فکری پہلوؤں پر براہِ راست گفتگو کی۔
یہ بھی بتایا گیا کہ کتاب "ہوا پر گرفت- علم، وحی، اور فلسفہ پر غور و فکر” الحكماء پبلشنگ کی (2026) کی نئی اشاعت ہے، اور اس میں کئی اہم مباحث شامل ہیں، جیسے: فلسفی نسبت، "کب کلمہ ضروری ہوتا ہے؟”، دو انسانیتوں کا فرق، یہ کتاب کس کے لیے ہے؟ وجود، وقت اور معنی پر غور، مقاصدی فکر کی فلسفہ، اور حکمت پر چند حواشی اور حقیقت کے چند سوالات۔
مسلم کونسل آف ایلڈرز 21 جنوری تا 3 فروری 2026 تک جاری رہنے والے اس میلے میں ایک خصوصی پویلین کے ساتھ شریک ہے، جس میں کونسل کی معیاری اور نادر مطبوعات پیش کی گئی ہیں۔ اس کے علاوہ مختلف سیمینارز، علمی نشستیں اور ثقافتی سرگرمیاں بھی ترتیب دی گئی ہیں، جن کا مقصد خیر، محبت، امن اور بقائے باہمی کی اقدار کو فروغ دینا ہے۔
مسلم کونسل آف ایلڈرز کا پویلین، قاہرہ بین الاقوامی کتاب میلے میں الازہر الشریف کے پویلین کے بالمقابل، ہال نمبر 4 (ہال التراث) میں، مصر بین الاقوامی نمائش و کانفرنس سینٹر، التجمع الخامس میں واقع ہے۔